ԳԱԳԻԿ ԾԱՌՈՒԿՅԱՆ

Ներկայացնել հայ թատերական արվեստն արտերկրում, հնարավորություն ընձեռել երիտասարդ դերասաններին ներկայացնելու իրենց տաղանդն ու հմտությունները. «Գագիկ Ծառուկյան» բարեգործական հիմնադրամի աջակցությամբ այս տարի առաջին անգամ Թատրոնի և Կինոյի պետական ինստիտուտի ուսանողները կմասնակցեն ՌԴ Սոչի քաղաքում անցկացվող «Пространство юных» ամենամյա միջազգային փառատոնին: Մայիսի 7-11-ը մեր երկիրը ներկայացնող երիտասարդ դերասանները կմրցեն տարբեր երկրներից ժամանած ուսանողական թատերախմբերի և մեծանուն ռեժիսորների սաների հետ:
Մեր երկիրը ներկայացնող թատերախմբի կազմում Երևանի Թատրոնի և Կինոյի պետական ինստիտուտի Նիկոլայ Ծատուրյանի արվեստանոցի ուսանողներն են: Միջազգային հեղինակավոր մրցույթին հայ երիտասարդ դերասանները ներկայացնելու են Լյուդմիլա Ռազումովսկայայի «Դեպի տուն» դրաման:
Մոտ 1,5 ժամ տևողությամբ ներկայացումը իրական փաստերի հիման վրա է և պատմում է նկուղում բնակվող անտուն երեխաների կյանքը: Ինչպես են նրանք ապրում մեկ հարկի ներքո, ինչ խնդիրների են բախվում և ինչ է սպասվում հասարակության կողմից մերժված այս երեխաներին: Հակառակ նրանց հանդեպ շրջապատի վերաբերմունքի՝ բոլորին միավորում է անսահման սերն ու միմյանց նկատմամբ մեծ հոգատարությունը: Ներկայացումը Հայաստանում արդեն իսկ մրցանակների է արժանացել, նախաձեռնության հեղինակները վստահ են, որ հաջողության են հասնելու նաև դրսում:
Յուրաքանչյուր ազգի ու պետության մասին խոսում է նրա մշակույթը. պատահական չէ, որ Գագիկ Ծառուկյան բարեգործական հիմնադրամը առանցքային տեղ է տալիս մշակութային ծրագրերին՝ զգալի ֆինանսավորում հատկացնելով դրանց իրականացման համար: Հիմնադրամի հովանավորությամբ կյանքի կոչվող հերթական այս ծրագիրը նպատակ ունի ոչ միայն հայ երիտասարդ դերասաններին արտերկրում ներկայանալու հնարավորություն ընձեռել, այլև օգնել ընդլայնելու աշխարհայացքն ու հաստատելու նոր ծանոթություններ:
«Пространство юных» ամենամյա միջազգային փառատոնը, որն անցկացվում է 2009 թվականից, մեծ հեղինակություն է վայելում արտերկրում: Փառատոնին իրենց մասնակցությունն են ունեցել երիտասարդ թատերախմբեր այնպիսի պետություններից, ինչպիսիք են Գերմանիան, Իտալիան, Ֆրանսիան, Լեհաստանը, Ռուսաստանը: Երիտասարդ դերասանները վստահ են՝ Հայաստան անունը բարձր են պահելու և դեպի տուն վերադառնալու են միայն հաղթանակած: